JEB-Renkontiĝo en Oksfordo aŭgusto 2019

Ariel Bonkorpa Aranĝoj 2 Komentoj

Kie?

“La Ponto de Vespiroj” de Tom Murphy VII, uzita laŭ CC BY-SA 3.0

Oksfordo estas historia urbo en suda Anglio. Ĝi estas facile atingebla de busoj kaj trajnoj el Londono kaj la cetero de Britio. Mondfama pro ĝia universitato, ĝi estas ornamita de belaj konstruaĵoj kaj vigligita de pluraj imponaj muzeoj. Krome, ĝi havas elstaran ĉenon de glaciaĵejoj, G&D’s, do efektive estas ĉio necesa por bona renkontiĝo!

La sabata programo okazos en luita ĉambro super ‘Turl Street Kitchen’, luksa kaj sendependa restoracio/kafejo, tre apud la urbcentro.

Kiam?

Cowley Road d Kamyar Adl, uzita laŭ CC BY 2.0

La renkontiĝo okazos de la 31a de aŭgusto ĝis la 1a de septembro. Ĝi komenciĝos je 13:00 sabaton (la 31an) kaj finiĝos je 16:00 dimanĉon (la 1an). Sed vi ne devas partopreni la tutan eventon, kaj povas esti, ke iuj homoj restos pli longe por festi.

Kie povas ni loĝi?

Ne estas oficiala loĝejo por la evento. Sed, se vi volas rekomendojn, bonvolu sendi al ni retpoŝton ĉe komitato@jeb.org.uk, kaj ni tre feliĉe helpos vin 🙂

Krom viaj loĝ-, manĝ- kaj vojaĝkostoj, ne estas kotizo por la evento.

Kion ni faros?

Sabaton tage estos programo kun:

  • La jarkunsido de Junularo Esperantista Brita. Por povi voĉdoni, membriĝu senpage antaŭ la evento.
  • “Ĉiu povas krei videoludon! Enkonduko al Twine kaj Bitsy” – ateliero de Ariel Bonkorpa pri kreado de ludoj. Kunportu vian komputilon se vi povas.
  • “La Esperantista Junulara movado por komencantoj” – prelego de Tyron Surmon
  • ‘Fulmoprelegoj’ – 5-minutaj prelegoj pri pluraj temoj. Ni bonvenigas viajn kontribuojn 🙂

…kaj multaj pliaj decidotaj eroj!

Sabaton vespere estos komuna manĝo en ankoraŭ ne decidita loko. Do, indiku viajn manĝpreferojn en la aliĝilo, kaj ni preparos kelkajn taŭgajn opciojn kaj decidos pri la loko dum la aranĝo. Poste, ni iros al loka Wetherspoons (brita pab-ĉeno) aŭ al G&D’s (elstara loka Oksforda glaciaĵejo, malferma ĝis meznokto), aŭ ambaŭ!

Dimanĉon ni faros:

Puntado en la Rivero Cherwell, kun Magdalen Turo en la fono
  • Gviditan rondiron de la urbo, vidante ĉiujn plej gravajn vidindaĵojn (Radcliffe Camera, Bodleian bibloteko, Ponto de Suspiroj, Oksforda Kastelo, almenaŭ unu kolegio), tute esperantlingve!
  • Premboatumado (punting) tra la Rivero Cherwell (tradicia Oksforda aktivaĵo, kaj bonega maniero por vidi la urbon)
  • Piknikon en Christchurch Meadows. Indiku viajn preferojn en la aliĝilo, kaj ni provizos la manĝaĵojn 🙂

Ni bonvenigas kontribuojn al la programo. Indiku en la aliĝilo, aŭ sendu mesaĝon al komitato@jeb.org.uk. Se vi planas fari prelegon, ni petas, ke ĝi estu ne pli ol 30 minutojn longa. Prefere estu fulmoprelego (5-10 minutoj). Atelieroj, ludoj, kaj aliaj programeroj povas daŭri pli longe.

Kiel alveni?

Estas rekta buso, X90, de London al Oksfordo, kaj tio kutime estas la plej malmultkosta opcio, je £8 por plenkreskulo. Se vi vojaĝas je tre frua horo, la Megabus-servo povus esti pli malmultkosta, je ĉirkaŭ £5.

Oksfordo estas facila trafebla per trajno el London Paddington. De aliaj partoj de Britio, ne ĉiam estas rektaj trajnoj, sed eblas iri al Reading aŭ Didcot Parkway kaj ŝanĝi tie. Alternative, eltrajniĝu ĉe Didcot Parkway kaj prenu la buson X2 al Oksfordo. Por mendi trajnbiletojn, ni rekomendas National Rail, ĉar ne estas mendkotizo. Se vi mendos per The Train Line, vi povos uzi viajn biletojn poŝtelefone. Atentu, ke en Britio tre indas aĉeti trajnbiletojn anticipe, kutime kelkajn semajnojn antaŭ la vojaĝo, ĉar alie povas esti tre koste.

La Oksforda urbocentro estas relative malgranda, do por piedirantoj estas facile atingi la renkontiĝejojn. Krome, estas tri buskompanioj, kiuj servas Oksfordon.

Mi havas demandon!

Perfekte, ni havas respondojn! Sendu mesaĝon al komitato@jeb.org.uk.

Helpu! Estas mia unua renkontiĝo

Ĉi tiu evento ne estas por kompletaj komencantoj lingve. Bone, se vi komprenas tion ĉi, vi havas sufiĉe bonan Esperanton por veni! Tamen, eĉ se vi parolas Esperanton bone, iri al via unua Esperanto-aranĝo povas esti nervoziga afero. Ni volas krei kiel eble plej komfortan etoson por novuloj, sed ni ne povas prepari por ĉiu ajn eblo. Do, se vi havas apartajn demandojn aŭ proponojn kiel novulo, kontaktu nin ĉe komitato@jeb.org.uk aŭ skribu en la aliĝilo.

Informoj pri Alirebleco

Bedaŭrinde, Oksfordo havas multajn antikvajn rondŝtonajn stratojn, kiuj povas kaŭzi problemojn por rulseĝuzantoj. Vi povas trovi plenan gvidon pri alirebleco en la angla ĉi tie.

La averaĝa taga temperaturo dum tiu periodo de la jaro en Oksfordo estas ĉirkaŭ 20 gradoj. Tamen, Brita vetero estas neantaŭdirebla, do povus esti pli varme, eble ĉirkaŭ 25 gradoj. Do se vi konsideras tion varma, kunportu somerajn vestaĵojn, sed prenu ankaŭ jakon, kaze ke ĝi iĝos malvarma. Krome, en Britio ofte pluvas, do prenu ombrelon!

Ĉu mi povas peti subvencion por ĉeesti la eventon?

eta.emblemo

Se vi estas sub la aĝo de 25, kaj loĝas en Britio, vi rajtas peti subvencion por ĉeesti la eventon kaj kovri ĉiujn de viaj kostoj, dank’ al NoJEF (Norviĉa Jubilea Esperanto-Fondaĵo). Vi simple devas sendi retpoŝton al la sekretario de la organizo (tim.owen@esperanto.org.uk) skribante viajn elspezojn, kaj promesu verki raporton post la evento. La organizantoj ofte uzis tiun-ĉi fondaĵon si mem, do se vi bezonas helpon kun la proceso, bonvolu sendi retpoŝton al ni ĉe komitato@jeb.org.uk 🙂

Aliĝi

Aliĝu al la evento ĉi tie

Ligilo al la Fejsbuka-evento

JEB partoprenas la festivalon Voilà! – kaj ankaŭ vi partoprenu!

Ariel Bonkorpa Aranĝoj Lasi Komenton

Voilà! Europe, teatra festivalo pri Eŭropo, okazos Londone ĉi-Novembre, kaj JEB partoprenas!

La 7an, 8an kaj 10an de Novembro, venu spektu Wesele / Wedding, teatraĵo en la pola kaj la angla, kun iomete da Esperanto, pri la lasta pol-angla geedziĝfesto antaŭ Briteliro (Applecart Arts, 170 Harold Rd, E13 0SE, je 19:15 + 20:45, £10).

Ariel Bonkorpa

Kaj la 10an de Novembro, venu al Esperanto – kio, kie, kaj kial?, interaga lingvoleciono kaj rakontseanco gvidita de Ariel Bonkorpa (Theatre Deli, 2 Finsbury Avenue, London, EC2M 2PA, je 12:45 – 13:45, £10). Ĝi estas parto de la Eŭropa Teatra Forumo, kaj per via bileto vi povos partopreni ĉiujn eventojn de tiu semajnfino.

Ni planas grupiĝi Sabate la 10an de Novembro por ĉeesti la lingvolecionon dumtage kaj la teatraĵon je 20:45. Biletoj des malpli kostiĝas ju pli multope oni aĉetas, do invitu vian amikaron por ŝpari!

JEB diskutas, festas kaj kreskas – raporto pri renkontiĝo en Londono 2018

Ariel Bonkorpa Raportoj 2 Komentoj

Mi treege ĝojas verki ĉi tiun raporton. Tiel multe, ke mi faris ĝin la finan tagon de la ĵusa semajnfina renkontiĝo, alveninte hejmen kun multe da novaj ideoj kaj entuziasmo. Ne nur estis vigla kaj amuza evento por spertaj Esperantistoj, sed venis ankaŭ pluraj novuloj, kaj ni ekhavis novajn komitatanojn dum nia jarkunsido. La renkontiĝo okazis en Londono, de la 25a de Majo ĝis la 27a, kaj ĉeestis 17 homoj tra la evento.

La evento komenciĝis Vendrede ĉe la Londona Esperanto-Klubo. Sophie Horrocks prelegis pri la diversaj junularaj aranĝoj, kiuj okazos ĉijare, kaj poste mi, Ariel Bonkorpa, prelegis pri la diversaj manieroj aktiviĝi ene de Esperantujo, ĉu per arto, organizi eventojn, instrui, kaj donis konsilojn pri kiel efike kaj daŭrigeble fari tion.

Legi plu

Venonta JEB-renkontiĝo: Londono en Majo 25a-27a!

Ariel Bonkorpa Aranĝoj Lasi Komenton

Ni ege feliĉas anonci nian someran Esperanto-renkontiĝon en Londono! La renkontiĝo okazos la 25an ĝis la 27a de Majo kaj inkluzivos viziton al la Londona Esperanto-Klubo, sesion kun prelegoj kaj ludoj, ekskurson al Natural History Museum, kaj komunajn manĝojn. La sesio okazos sabate kaj celas novulojn, enhavante programerojn kaj angle kaj esperante.

Klaku ĉi tie por plenaj detaloj kaj aliĝilo.